Concerto VigoFem 2025 – UXÍA “Será por flores”

Domingo 19 de outubro, 19:00h
Entrada libre ata completar aforo.

A terceira edición de “VigoFem” despregará, desde o martes 14 ao domingo 19 de outubro, cinco citas culturais protagonizadas por mulleres. “Pretendemos poñer en valor a capacidade transformadora da cultura protagonizada por mulleres poñendo no foco a cultura e as mensaxes que as mulleres queremos trasladar á sociedade”, explicou a tenente de alcalde, na presentación do programa coordinado por Isabel Blanco.

Uxía é considerada a gran dama da música galega. Nos seus case 40 anos de carreira artística, renovou a música tradicional galega conectándoa coas culturas atlánticas, mesturando alalás con morna, fado e ritmos brasileiros.

Dende a súa estrea con *Foliada de marzo* en 1986, o seu traballo representa un punto de encontro de diferentes culturas, e creou o seu repertorio a través das súas continuas viaxes e intercambios con músicos de Brasil, Portugal, Cabo Verde ou Guinea-Bisáu, como João Afonso, Dulce Pontes, Rui Veloso ou Tito Paris.

Publicou 12 discos polos que recibiu importantes recoñecementos, entre os que destacan o Premio da Crítica Galicia 2016 ou o Premio ao Mellor Álbum de Música de Raíz nos Premios de la Música Independente de España por *Meu canto*, seleccionado tamén como *Top of the World* pola revista británica *Songlines*. Entre outros proxectos, é a directora artística e alma mater do Festival Internacional da Lusofonía *Cantos na maré*.